TRISTESA I SOLEDAT

Ora bo ta kresiendo di mucha bira adulto, bo ta pasa den hopi kambio.

Bo ta bai un otro skol. Amistatnan ta kambia. Por ta ku nan ta pèster bo, òf bo ta mira mucha ta pèster otro. Por ta bo mayornan pasa den un divorsio. Demasiado stress por pone bo sinti deprimí. Tin bia bo tin e sintimentu ku bo no por ku tur kos.

Durante pubertat hopi kos ta pasa ku bo kurpa. Esaki por pone bo sinti hopi insigur. Hopi mucha i teenager ta sinti nan so de bes en kuando. Asta ora nan ta huntu ku otro hende.

Bo ta sinti bo tristu òf bo so hopi bia?

No isolá bo mes! Realmente e ta yuda pa papia tokante bo problemanan. Por ehèmpel ku bo mayornan, un amigu(a), òf un otro hende ku bo ta konfia.

Semper bo por yama nos. Nos ta bai skucha bo i purba yuda bo.