TÈRMENTU

Nan ta pèster bo na skol? Òf bo no ke hunga pafó pasobra otronan ta hari bo? Bo ta sinti hopi bia ku nan ta laga bo pafó di un grupo, òf ku nan ta ignorá bo?

Tèrmentu por pone bo sinti teribel: desesperá i deprimí.

Tin hopi forma di tèrmentu. Aki tin algun di nan:

• Pèster òf grita un hende
• Humiá un hende
• Hari un hende atrobe i atrobe
• Laga un hende afó
• Diskriminá un hende

Esakinan tur ta formanan di tèrmentu. Hende tambe ta pèster hopi online, por ehèmpel den grupo di Whatsapp.

Lástimamente, tèrmentu ta algu ku ta pasa masha hopi. Bo no ta e úniko hende ku nan ta pèster!

No keda ketu, pero papia tokante di dje ku un hende ku bo ta konfia. Un amigu òf un miembro di famia por ehèmpel. Bo por yama nos tambe. Bo por konta nos semper kiko ta pasando!