Loverboys

Un mucha hòmber òf un hòmber ku ta gusta bo i ta skucha bo. Un hende ku ta duna bo atenshon òf asta regalo… Esei no ta zona maravioso?

Pero tin bia un mucha hòmber no ta aktua asina pasobra e ta gusta bo. E ke pa bo namorá di dje. I e ta bai hasi bo totalmente dependiente. Despues e ta bai obligá bo pa hasi sèks ku otro hòmber. Òf trafiká droga.

Den e kaso ei bo ta e víktima di un loverboy. Un loverboy no ta stima bo! E ta un kriminal buskando víktimanan. E ta bai purba haña mucha muhénan den su poder. Por ehèmpel dor di hasi bo adikto na droga. Tambe e por bisa bo ku bo mester paga debenan promé ku e por laga bo bai.

Bo ta víktima di un loverboy? No sinti bo bergonsá: no ta bo falta! Asina ta ku por fabor no warda i pidi ayudo. Pasobra un loverboy ta kometé un krímen serio. Nos ta yam’é abuzu seksual.

Bo por hasi nos un yamada anónimo (sin menta bo nòmber)! Nos lo skucha bo i nos sa unda pa haña ayudo. Nos t’ei pa bo!